Wallee waa hankaag daran

 

Hadal aan wadaagno 

Waa heshiin karaankay

Wanaag doonistaydoo

Wadooyinka halaq gala

Waaga aan u barinoo

Nabad maalno waayaha 


Walbahaarka gaaraha

Waabaayda ii qasan

Waad cabi markaagee

Ha walaaqin doorkeey 


Wadankaan lahaa iyo

Darbiyadan wareegsani

Waxaa lagu wanjalayaa

Maskiin wiirsi aan mudan

Wuxuu xaq lahaa idil

Weel neefsadoo godan

Dalluun kun wadood furan

Shaati wayne aan dharag

Wuxuu laqay bar muuqdaan

Wallaahida maraa baa

Wiski dheer ku iibsada 


Dhalinyaro walaacdoo

Tiro weyd ah toban ka ah

Wariskeeda sooyaal

Waxa lagu dhex sheegaa

Saddex magac wallaahi leh

Inay weyso dhoorteen

Ooy weer ku diideen

Washensiga tirada badan

Ku weegaaran guudkood

Wixii ay ku keeneen

Waatan loo waqdhisayaa 


Shaqsi caabud baa waran

War ma dhurahaa dhiban

Wadka nin u yeeroo

Aduunkoo wareegiyo

Aakhiro warkeed raba

Halkuu waaxid tuugmada

Dhimashada ku waaqsiga

Ruuxdiisa warin laa

Wadar buu ku taamaa

Inay maalin wiiqmaan 


Siyaasada waswaaska leh

Waxa laga dhaxlaa jeer

Laysla waayo muufada

Iidaan warkiis daa

Kala dooro un waaye

Libaax iyo waraabaha

Mid wareemo ruuxdoo

Marxuumkii laguu waco 


Wado waaye xanaf tiran

Waxiid baa kasoo diray

Waab deyran samadoo

La malaysan waxa yaal

Suubanena kasoo wari,

Awr-kacsi way ka wayntee

Waadaduse waayadan

Furuuc un wax loo saar

Gaalnimay waqlalayaan 


Nimuu soo wajahay wed

Waanada ma qaatee

Madaxuu u weecshaa

Walaahoowga goob dhuran



Cadaaladi walaacday

Ninkaan weero dheerayn

Ninkaan muruqyo waynayn

Kaan waldaysyo¹ buurnayn

Wajac buu tilmaan yahay

Wirwiraayo dhimir yari



Walcankeeda gaajada

Nimeey wiig la joogtoo

Washamsi ay ku qaadaa

Waag¹ iyo u kici tama

Safar wakhti qaatee

Wallee waa hankaag² daran

Wax ruuxaad mudaysoo

Kugu wiirsanaayaa

..............................................................................

1- Waag: socod badan oo wax lagu baadi goobayo

2- hankaag: Daal iyo dhibaato badan lagala kulmo socod muraadkii lagu hungoobay.

.............................................................................

-Cumar Dheemow

-23. March. 2021


Comments

Popular posts from this blog

Waxbarashada Soomaaliya.

Mashruuc aqooneedka I. M. Lewis.

UNOSOM I&II